沙巴之旅: 水上活動篇 - 浮潛, 潛水, 激流

黎到沙巴, 最期待莫過於玩水上活動

我地三個人都識游水, 不過就算唔識既, 都一樣玩得

由於玩水上活動, 所以都無帶相機,

而呢啲相, 全部都係當地人幫我地影架

多謝佢地呀, 全靠佢地偷拍, 我先可以留念咋

講下當日既情況先: 

由於當日去既時候, 已經不停落雨, 教練話, 如果再不停咁落, 可能太危險,

不適宜玩激流, 年少無知既我就覺得, 咁先夠激架麻

而教練話: 水勢達到5級, 就不能玩

幸好, 當我地差不多去到既時候, 雨就停左, 

教練四周觀察左一段時間, 話宜家達到4級, 可以玩呀

我同姐夫真係玩到無比咁興奮

其實好玩在咩呢? 就係一Team人, 面對住狂風巨浪,

大家一定要一條心, 要整整齊齊好有規律咁一齊撐好自己支船掌,

唔可以你前我後, 一定要一齊, 由前向後咁撐,

否則, 就會好易反船, 如果跌左落海, 旋渦會將你捲落海底,

咁就好危險, 因為海底有好多大石, 會撞穿頭

一去到啲激流位, 架船會90度直插, 我地依然要不停撐, 真係刺激都爆唒燈

而家姐就比較驚, 而且佢仲亂咁撐, 比我不停罵佢, 因為佢撐到成日卡住我支撐

教練安排姐夫及另一位男團友坐船頭, 因為佢話船頭果兩位, 係最重要既

我地既命仔就靠唒佢地喇

呢位教練好勁, 一直一馬當先, 而響我地博殺緊既中途, 領隊先生不幸由第二架船度跌左落水,

我地呢位Super教練就直撐過去拯救佢, 一手將佢由水中扯番上我地架船,

而領隊先生被救之後, 一臉驚惶, 我先知道, 原來都危險架喎

之後領隊先生過番佢自己架船, 我地就繼續勇往直前 

玩左大約20分鐘, 終於落番黎山腳, 水勢比較平伏, 

Super教練突然要我地跳落水, 到底搞咩呢, 

我地唯有照跳啦, 其實都好驚被沖走架. 所以捉到條繩實一實,

後來佢又逐個扯番我地上船, 佢真係好大力架, 一野就連男人都可以扯番上黎,

後來我地都唔明點解要我地落水架, 可能Super教練想我地浸下激流掛,

或者想train下我地既膽量啦, 不過我又好開心佢比我地試下落水喎

最後尾聲大合照, 終於可以鬆一口氣, 個個都無事, 所以笑得好開心,

下面呢位就係Super教練喇, 即刻搵佢影番張合照先 

由於浮潛同潛水期間, 都係用防水相機, 無soft copy, 所以post唔到出黎喇

唯有post我張潛水証書啦, 每一位潛水人士, 都要先上一個training, 

而所謂既training, 其實係已經揹唒樽, 跳唒落水, 佢地只係講解一下手勢, 

例如咩手勢係要即刻上番水面等等......

而成團人裡面, 只係得我, 同我家姐兩個女仔去潛水, 

所以我地有一個私人教練, 專責搒住我地,

呢位教練真係細心, 基乎無放過手, 由頭到尾都響我地上面揸住我地揹住既樽, 

拖帶住我地咁潛, 轉左, 轉右, 潛高, 潛低, 佢都控制唒, 

我同家姐就好似兩條浮屍咁漂蕩, 而我地又好麻煩, 一個耳仔痛又話要上水,

一個眼罩入水又話要上水....如是者, 我地上過5~6次水面, 

上完又潛, 潛完又上, 教練就將我地扯上..又扯落...

班男仔一早去到老遠, 執海星, 我地仲響度浮浮沈沈,

最終, 我同家姐都無辦法去到執海星咁遠, 同咁深, 

總括來說, 潛水係辛苦既, 個肺比水壓得好厲害, 耳仔要不停做擴張,

同埋潛入水底果份恐懼, 我覺得驚恐過玩激流好多呀

但我都無後悔既, 因為我總算叫做試過吖

問番教練, 我同家姐剛才潛到幾深, 佢話10米, 即係30尺深, 

真係失禮唒!!!