瘋狗症針

Moecca就黎6歲喇

雖然Moecca身體健康, 不過都要重新注射瘋狗症針同續牌,

就好似攞張狗狗居民身分證咁!

由於睇開維多利, 感覺麻麻地, 一來登記妹態度唔好, 二來外籍醫生講完一大輪說話之後, 佢地只會翻譯一句......

(其他人叫佢地做登記護士, 但我覺得佢地唔配, 所以眨佢地為"登記妹")

由今次開始, 我決定轉去睇屯門動物醫療中心,

首先, 我打電話去查詢, 預約

Um...... 態度幾好, 一於試下呢間啦!



星期日的一個早上, 我整裝待發: 不能穿V領, 大領, 易走光, 易抓爛, 易磨損的衫褲!

手鍊要除, 頸鍊要除, 最好束頭髮, 平底拖....

(點解要咁誇張? 未見識過既人有所不知, Moecca既反抗能力非同小可, 佢可以在我懷抱中自轉360度; 帶佢去剪腳甲, 佢可以好似小新咁成隻跳上我個頭度抓實, 即係腳在膊頭上, 雙手攬實我個頭, 我就面貼住佢個肚! 此情此景, 只有我男友, 同埋狗鋪店主最清楚! 有時一入到去仲會賴尿潻, 真係講都無人信, 牛高馬大既Moecca, 竟然膽小如鼠)



11:30am

『Moecca, 去街街喇』

Moecca好興奮咁跳跳紮, 狂叫, 以為去散步......

落到去平台仲見到哥哥潻(我男友), 更加興奮......

我地搭的士去, 一上車, 便擔心Moecca會嘔!

(又點解呢? 未見識過既人又有所不知, Moecca試過坐車去西貢游水, 沿途嘔了6-8次; 去小欖BBQ, 沿途嘔了2次; 如果坐去新屯中就好d, 因為短路程; 而今次去新墟, 由於唔係太遠, 希望唔會嘔啦)

而最心慌既就係, 我唔記得帶定個膠袋, 萬一嘔起上黎, 就大鑊喇

於是開左小小窗, 比佢吹下風!



11:45am

到達診所門口!

嘩, 入面好多狗狗呀, 有隻白色史立莎無帶繩響入面走來走去, 另外兩隻黑色BB狗手抱住.....

Moecca見到咁多人, 咁多狗, 已經響門口扎馬, 唔肯入, 我打算抱佢之制, 又有個女人企響門口係咁同我講野, 問Moecca係咪貴婦, 好得意....(咁我都要應人架麻)

一片混亂之下, 我身水身汗咁抱左佢入去, 而入面既人就好醒目咁拖番住自己隻狗,

跟住即刻有人讓個位比我坐, (我感覺自己好似大肚婆咁, 哈哈) 我亦唔客氣喇, 因為Moecca好重呀, 佢又驚到成個身硬唒咁, 仲難抱

坐左一陣, 又多隻松鼠仔入黎, 佢一黎到就登記喇, 而我地仲十下十下坐響度, 都未登記, 我抱住Moecca又行唔到, 於是攞唒d身分證, 針卡, 舊狗牌比我男友幫我登記囉!

我今次又失察, 穿左短褲, 被Moecca指甲插到我大肶花唒

坐下又同下其他朋友仔傾下計, 支支渣渣, 嘈死d登記妹, 成班友好似開Party咁

我地都不忘同Moecca做下模擬練習架!

(什麼是模擬練習? 就是抽起佢頸頸塊皮, 然後用手指"吉一吉" 扮同佢打針, 咁做得多, 佢就無咁驚啦)

其他朋友仔睇到都響度笑, 連我自己都覺得好好笑

呢度有個磅, 緊係要磅下呢隻肥Moecca有幾多斤啦!

點知, 出乎意料地, 我以為佢有二十幾至三十磅架, 點知原來佢得19.3磅咋, 比我想像中輕喎, 不過我抱佢就覺得好重啊!



12:05pm

由於我地係最遲登記既, 所以狗狗都走得七七八八了!

瞬間一片寧靜, 我地唯有繼續做下模擬練習啦!

登記妹宜家先有時間同我對一對資料, Moecca, 不是Mocha, 已絕育......

佢話Moecca好耐無打針, 要打多支6合1既疫苗, $200

加埋瘋狗症針, $250, 合共 $450

我都唔知咩係6合1既疫苗, 但係佢地又堅持話要打, 咁我諗打左大慨都無壞既!



12:10pm

入去喇, 好緊張呀

我第一時間抱Moecca上枱, 佢條尾已經卷左入個肚裡面......

醫生好有善喎, 知道Moecca驚, 不停叫住佢個名, 又摸下佢, 好似好有愛人咁喎

摸多幾摸, Moecca已經嚇到差d趺左落枱, 好彩我接實左佢......

醫生話想同佢探熱, 問我: 『你估佢比唔比我同佢探熱?』

我答: 『我諗唔得喇, 佢連抺pat pat都唔比我抺架, 所以應該探唔到喇!』

醫生就話: 『咁好啦, 咁我唔探喇!』

我同醫生講明先, Moecca好神經質, 可能會成隻彈起, 或者好大反應架!



Moecca騰騰震, 個樣好唔有善咁, 於是醫生問我: 『駛唔駛同佢帶番個口罩呢?』

我話唔駛架喇, 佢唔會咬人架!

於是隨即拎左兩支針過黎, 我都心驚驚, 唯有捉實佢個頭, 按實佢耳仔, 攬實佢, 錫住佢個頭......而登記妹就捉實佢後面, 我男友就手指指住D海報, 同佢講: 貓貓呀, 我又一齊講: 貓貓呀, 邊度有貓貓呀! 於是佢又望住張海報搵貓貓

就係咁, 打左第1支針喇, Moecca又好老定喎, 連我都唔知打左

一支接一支, 再黎第2支!

我地又繼續好白痴咁同Moecca講: 邊度有狗狗呀, 果度躂躂聲做咩事呀? 咁佢又會望下架喎!

(唔知醫生同登記妹會唔會覺得我地好白痴呢, 兩個傻既好似揼細路咁揼隻狗)

就係咁, 好順利就打完兩支針喇, 比我想像中定好多喎, 起碼我都無披頭散髮咁出返黎啦!

跟住比埋錢 $450, 攞埋張臨時狗牌同針卡就走人喇, 最開心就Moecca啦! 我就肉赤喇!



12:25pm

我地行番入去新墟的士站等的士, 一上到車, Moecca好似好累咁爬響我大肶度訓覺,

我心諗, d藥力咁快就令佢咁眼訓?

架車行左無幾耐, Moecca突然流口水, 我心知不妙喇, 之後佢又突然坐響度, 個樣怪怪咁, 我即刻拎定張紙巾, 準備定!

點知正當我攤開紙巾之制, Moecca就忍唔住, 嘔出黎喇

我用紙巾接左9成, 有少少流左落我男友條褲度, 的士保得住, 如果唔係又要我另外比錢佢洗車架喇!

個的士司機好緊張, 又遞報紙, 又遞膠袋, 一應俱全! (但係佢仲揸緊車架喎, 都可以遞到咁多野既?!)

我叫佢放心, 你架的士無事!

Moecca嘔完之後又好生猛, 即刻又要企響度睇風景

12:50pm

終於返到屋企喇!

好累呀, 消耗左好多體力咁!

Moecca都好累了, 抺完腳仔, 水都唔飲, 就爬響我大肶度訓覺覺喇

對Moecca黎講, 打針如蚊針, 其實佢都唔怕痛既, 只不過環境各方面令佢好緊張姐