東京第四天: 上野恩賜公園, 上野動物園, 不忍池, 上中/阿美橫

今日天氣好左好多, 好適合户外活動

同樣地, 我地一早就出發! 

住響上野, 去好多地方都比較近,

坐一個站, 就可以去到上野恩賜公園

呢度都有間"多慶屋", 大型雜貨店, 想買化妝品, 酒, 零食, 兼且要退稅的話,

"多慶屋"就係最理想既地方

好快就行到上野恩賜公園, 入口就有夥早開的櫻花樹

呢度有個餵鴿婆婆, 我地都帶左麵包, 一齊加入餵鴿行列

班鴿鴿見到我拎住袋麵包, 好似馬騮山既馬騮咁, 飛樸過黎想搶

開始步入公園喇, 好少人, 好平靜

下面呢隻雀雀, 偷櫻花食

公園內有個"花園神社"

又有早熟的櫻花

離開花園神社, 我地繼續向前行

由於所有行程都係由KaKa安排, 所以我每一日都唔知自己會有咩活動, 

好神秘, 我淨係跟住KaKa四圍走, 

行下行下, 先知道今日原來今日係去動物員 

入場費好平, 每人600円

呢隻阿鵝到底做緊咩呢??

佢隻右腳冇落過地, 唔通阿鵝都玩儒家?

仲有少量麵包, 我地偷餵小鹿, 佢食到舐舐脷

隻馬騮唔知係咪太悶, 揸住舊石頭響地下磨呀磨呀, 

好似原始人響度鑽石取火咁

響上面呢個迷你馬騮山入面, 大家搵唔搵到邊度隱藏左隻馬騮?!

動物園內有東/西列車往來, 可以chop印留念

有個羊羊專屬既地盤喎, 正呀, 有得摸摸

呢度掛住好多毛毛擦, 可以攞黎幫羊羊擦下毛, 

仲有迷你掃把, 可以幫手掃下啲羊屎, 

我諗把掃把咁細, 可能係專為小朋友而設既, 訓練佢地要幫手掃屎, 

所以呢啲粗重功夫, 應該留番比小朋友做啦

下面呢隻羊BB, 幫佢擦下爬既時候, 個咀咀嘟左出黎, 好搞笑  

同場仲有其他動物

離開羊羊既地盤, 我地又繼續去睇下其他動物

下面呢夥樹, 好似蘿蔔 

阿河呀

上野動物園唯一一間紀念品商店

呢隻斑馬同佢個介紹牌一樣, 都係以Pat Pat示人, 無另過轉頭 

我見到呢個小妹妹個口罩好得意, 所以偷拍佢 

行完動物園, 再兜過隔離"不忍池"行下

海鷗同學, 你地一人一支, 唔好爭位企呀 

原本海鷗同學乖乖一人一支企定定響度,

後來發現我地袋麵包, 即刻飛唒過黎

我原本以為好似睇電視咁, 舉起隻揸住麵包既手, 佢地就會飛過黎啄,

點知, 事與願違, 佢地好似好驚, 唔敢飛埋黎食, 要你拋出去先肯食

又原本, 我諗住叫KaKa拋麵包響我附近, 捕捉海鷗滿天飛既一刻...

點知, 佢竟然將麵包拋正響我正前面

咁啲海鷗就近距離響正我塊臉前面搶食, 嚇到我頭都唔見埋

不過又好開心, 覺得好刺激, 好好笑

下面呢兩位"雀神" , 係當地人, 似係定時定候會黎餵雀既,

因為啲麻雀都唔驚佢地, 企唒響佢隻手度食, 完全將佢隻手當係食物兜

行完不忍池, 輕鬆一輪之後, KaKa突然記起自己book左3:00去貓頭鷹cafe,

但係宜家已經差不多3:00喇, 仲要搭多一個地鐵站先到, 

咁無辦法啦, 去唔到, 由於No-show會被black list, 所以都無再book第日去喇

之後去左"上中"同"阿美橫"行街, 

有好多遊客都會黎呢度, 我地都聽到好多講國語同廣東話既人,

其實呢兩條街只係一左一右, 即係向左走, 向右走

不過我就麻麻地呢兩條街, 因為佢係賣波鞋, 運動衫多, 

其他店舖好似行緊花園街咁, 有啲唔靚既袋啦, 鬼五馬六 

有啲似係海味既野啦, 普通手信呀, 零食都有既, 

藥房又細細間咁, 行得唔舒服囉, 所以去番多慶屋買仲好 

最後, 介紹下呢間叫"SUKIYA"既食店

除左價錢平之外, 仲要係好好味

呢度既店員一腳踢, 開舖就抺門抺窗抺枱抺櫈,

有客到就遞水招呼落單, 之後碌番入去煮野食, 煮完拎出黎,

客人食完就去收錢, 之後執碗, 洗碗, 忙過不停

由於店員好忙碌, 所以每張枱都會有個鐘仔, 你要落order, 就按鐘啦,

咁店員就會知道有人叫佢, 佢就會行過黎招呼你架喇,

唔知係咪一腳踢好辛苦, 我地見到佢有張poster寫住請人, 時薪約港幣70元

呢幾日少食菜, 買包沙律菜番酒店食下先

Aeon出品, 份外親切

~ ~ 第四天完結 ~ ~