東京第六天: Tokyo Tower東京鐵塔, 增上寺, 羽田機場回港

由於今晚先至碌出機場坐零晨01:25航班回港, 因此今日仲有全日時間去玩,

朝早起身check-out, 留底兩件行李響酒店, 夜晚先再番黎拎

由於3 day pass乘車劵已經用完, 今日去邊都要買車票,

見到東京地下鐵又有一日乘車劵買, 咁方便, 緊係買一日劵啦,

 每人600円 

咁到底今日去邊度玩呢?

搭左15~20分鐘, 黎到神谷町駅, 

一出地鐵站, 遠處就可以見到

原來係"東京鐵塔"

距離地鐵站, 大約行20分鐘, 東京鐵搭就會響正你頭殼頂之上 

走過綠地毯, 就可以到購票處

(咁行出面條廣闊既石屎路都得既, 我地都無突登走去行綠地毯)

門票主要有兩種選擇:

1. 上一半(大展望台):  150米高, 大人票價900円;

2. 上最高(特別展望台): 250米高, 大人票價1600円,  

(此票價包括上大展望台, 及特別展望台)

我將個決定權交比KaKa, 自己就四周圍行行企企

KaKa話一場黎到, 決定上到最高  

入口無咩人, 正呀 

一開始, 先上150米高, 即係東京鐵塔既中間睇左先

  

呢個高度, 大慨同對面既大廈睇齊

Bling Bling Tokyo Tower 

150米高既中層, 其實都有兩層, 其中一層有手信店 

步行上兩層, 先可以再搭lift上到最高

下面係等lift層

一上到黎, 當堂覺得高左好多

佢有地圖介紹主要既大廈名稱, 最中間既就係"富士山"

睇到富士山嗎?

搵下啦, 有架

睇唔清楚?  Zoom近啲啦

 

再近啲

宜家睇到喇掛

估唔到, 第一日去河口湖遇著天氣唔好, 睇唔到富士山,

到第六日上東京鐵塔, 同富士山既距離拉到咁遠, 但竟然睇得到喎

再去睇下其他風景先

見唔見到另一個巨塔~東京晴空塔"SkyTree"響邊呀?

由於東京鐵塔係尖既, 所以最高層既地方唔係好大, 唔夠中間果層咁廣闊, 

亦好彩, 可能我地早, 未開始多人, 所以基乎360度每一塊玻璃,

我地都企到埋去盡情影

呢度有塊倒後鏡, 專係設計比遊客可以自拍背後既風景,

日本人真係好細心 

行完250米高, 又落番去150米高既另一層行下

下面呢隻尖頭似蘿蔔既公仔, 係東京鐵塔既吉祥物 

地下有個小型展覽館, 記載當年東京鐵塔既構圖,

早於1958年落成, 總高度333公尺, 比巴黎既艾菲爾鐵塔還要高出13公尺

離開鐵塔, 同吉祥物say goodbye 

穿過附近一個公園, 去到增上寺既後門

增上寺係以東京鐵塔為背景既著名寺廟

幫KaKa影呢張影得幾好  (沾沾自喜) 

行番出去我地買左一日劵既Tokyo Metro站搭車, 

原來行過黎容易, 出番去咁難, 兜兜轉轉, 行左超過30分鐘

去Supermarket買番啲水果食下先, 咁啱又比我搵到另一個朋友想要既手信, 

呢啲到底係我同手信既緣份, 定係佢好彩呢,

因為我之前去左幾間幫佢搵, 都搵唔到, 其實係le creuset系列既一粒磁石,

仲要係買飲品送既贈品黎, 所以先要搵到支飲品, 

再睇下有冇送埋呢粒磁石 

咁下一站去邊度好呢? 心心不憤既我, 決定第3次要去搵BaoBao, 

由於宜家仲係三點幾, 應該未比人搶唒掛, 於是我地又搭去銀座, 

今次熟路,  一落車, 就直闖入該商場, 3/F, 轉左直行......轉右......

滿懷希望, 作最最最後衝刺既我, 一行到, 見到既,

又係一層又一層空空如也既層架,

當時有少少崩潰既感覺, 不過已經好過琴晚, 

因為現場仲有兩個最大size既BaoBao, (琴晚得一個最細size既)

但我係想要6格果款, 而且果兩個最大size既只係得番銀色同白色,

好肉酸, 所謂吃不到的葡萄是酸的,  

呢一刻, 我突然好憎呢個袋, 巴屎閉咁番咁少貨, 懶珍貴,

枉我仲一次又一次, 死心不息, 行到腳軟, 都仲要堅持去搵, 

仲要無辜既KaKa陪我一齊癲 

我好後悔, 所以決定, 呢一生都唔會買呢個死人BaoBao袋

離開呢個令人"不安"既銀座, 又去番上野, 

站內已經為櫻花作好準備喇

呢間Yamashiroya, 同博品館一樣, 專係賣公仔,玩具,模型,卡通人物...

無意中發現有間"一蘭", 響香港咁出名, 試下佢有幾堅先,

自從響北海道食過碗令人回味至今既拉麵之後, 就再搵唔返果種味道喇, 

就算之前響大阪, 食過幾間拉麵店, 都係食唔番果種味

入到黎, 自助買飛仔先

又唔係貴喎

響等位其間, 職員已經比定張紙仔, 圈出你想要既獨特口味

入得喇, 原來座位係排排坐, 一格格咁, 外套掛響背脊後面

手袋可以掛響台下面

(都話啲日本人好細心架喇, 照顧周到)

職員會響前面個窗口收左你剛才買既飛仔, 仲有你揀選口味既紙仔,

之後拎碗麵比你, 佢就會落簾 

第一啖, 試左個湯底先 

好Surprise喎, 個湯底好接近響北海道食果碗呀

不過KaKa話啲麵質有啲過"淋", 始終係差少少喎

如有須要, 可以按鐘仔call店員

          

係時候返酒店拎番啲行李去機場喇

拉住兩個沉重既行李, 舉過上上落落既樓梯, 穿越一個又一個既人潮...

黎到上野坐JR去浜松町, 就可以轉車去羽田機場喇

由3月14日開始(即係聽日), 又多一架"北陸新幹線", 

最快可以66分鐘, 直達富士山, 

到時呢個車站, 一定會比宜家更多人

買車票都要小心, 呢度有啲混亂, 要買啱果一架同果一條線

衝呀......殺呀......

遇啱放工時間, 啲人好急架, 基本上好似冇人會慢慢行架 

我地拉住個喼, 心諗: 咁多人, 一陣點迫入去搭車

好彩, 我地穿過人群之後, 行到山手線, 突然又無咩人喎

仲有位坐潻

黎到浜松町, 即係轉車去羽田機場果度, 見到有locker, 

兩個Model, 埋去度下啱唔啱size入先, 下次有機會就可以租喇

 Good fit 

買車票去機場喇

每人490円咋, 點解咁平? 因為羽田機場距離呢度只係幾個車站架咋,

非常近, 如果黎東京, 揀左成田機場的話, 就會遠好多喇

顯示牌上有3架車, 全部搭得, 只係佢會停既站唔同, 

例如第1架, 停既站好少, 如果係去羽田機場的話, 揀佢就快好多喇

好快就到喇, 估唔到, 好似香港既機場快線咁, 

一落車, 已經到左羽田機場

機場入面既商店街都佈置得好靚

努力買埋最後既手信, pack好唒行李, 準備去check-in

Total: 38.5kg, 即係86.2磅, 比預計既輕喎 

check-in唔係好多人, 我地仲有大把時間

出去展望台睇下風景

由於羽絨都寄唒艙, 所以出到黎好凍

入埋immigration, 原來Duty Free入面都有好多手信買, 仲免稅潻, 

所以又買多幾盒, 加多支酒 

等上機既地方都好寬敞, 

我地訓一陣先, 等上機, 返香港喇